Bul týraly Almaty oblysy kásipkerleri men ınvestorlarynyń forýmynda málim boldy, dep jazady Qamshy.kz aqparat agenttigi.

Taldyqorǵanda Almaty oblysynyń kásipkerleri men ınvestorlarynyń İİ forýmy ótti. Sharada Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamenti men Óńirlik kásipkerler palatasy arasyndaǵy Jol kartasynyń qorytyndysy aıtylyp, ózara yntymaqtastyqtyń jańa bastamalary tanystyryldy.

Forým moderatory Almaty oblysy Kásipkerler palatasy Óńirlik keńesiniń tóraıymy Rımma Salyqova aımaq kásipkerleri men ınvestorlary úshin ákimshilik kedergilerdi azaıtý, sondaı-aq birlesken is-qımyldardy júzege asyrý boıynsha usynystar engizýde atalmysh sharanyń mańyzdylyǵyn atap ótti.

Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty oblysy boıynsha departamentiniń basshysy Serikbaı Nurǵısaev óz sózinde memlekettik organdardyń esep berý jáne baǵalaý júıesin jetildirý, sondaı-aq syrtqy baǵalaý mehanızmderin anyqtaý arqyly qoǵam men memlekettiń múddesin qorǵaý, azamattyq qoǵam ınstıtýttarymen yntymaqtastyqtyń ártúrli nysandaryn qurý kásipkerler qoǵamdastyǵynyń memleketke degen senimin arttyratynyn jetkizdi

Forýmda Almaty oblysy Kásipkerler palatasynyń dırektory Narıman Ábilshaıyqov «Atameken» UKP qyzmetiniń basty nátıjelerine toqtaldy. Oblystyq Palata basshysy UKP men Úkimettiń birlesken jumysynyń arqasynda Salyq jáne Keden kodeksterine eleýli ózgerister engizilip, bıznesti qaıta retteý, qylmystyq zańnamany izgilendirý boıynsha aýqymdy jumystar atqarylǵanyn aıtty.

«2018 jyly bızneske baǵyttalǵan 23 memlekettik qoldaý sharalary boıynsha ruqsatanama qujattardy reınjınırıngileý jáne 584 qyzmetti ońtaılandyrý boıynsha jumys jalǵastyrylady. Óńirdegi qordalanǵan máseleler Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrystaryna shyǵarylady. Keńes quramynh quqyqqorǵaý organdarynyń basshylary men qoǵam qaıratkerleri múshe. Jergilikti quramdy damytý men úlesin arttyrý maqsatynda jumys komısıasy qurylǵan, onda ákimdikter men salalyq basqarmalardyń jumys nátıjeleri tyńdalady», - dedi Narıman Ábilshaıyqov. Otandyq óndirýshilerdi qoldaý jóninde aıta kele, Narıman Ábilshaıyqov ákimdikter men memlekettik organdardyń resmı ınternet-resýrstarynda memlekettik satyp alý týraly ózekti aqparattyń joqtyǵyna nazar aýdartty. Atalmysh másele Jetisý kásipkerleri aldyndaǵy kedergilerdiń biri bolyp otyr.

Spıkerler sońǵy jyldary elimizdegi sybaılas jemqorlyqqa qarsy saıasat túbegeıli ózgerip, túrli sharalar qolǵa alynǵanyn aıtty.

Aldyn alý sharalary - bul strategıalyq mindetterdiń biri bolyp tabylady, deıdi  Sybaılas jemqorlyqqa qarsy is-qımyl ulttyq búrosynyń Almaty oblysy boıynsha basshysy Danıar Turǵanbaev. Osylaısha jumys baǵyty jemqorlyqtyń saldaryna emes, alǵysharttaryna aýysqan.

«Bizdiń tarapymyzdan shaǵyn jáne orta bıznes ókilderin qyzmetterine zańsyz aralasýdan saqtaý úshin barlyq sharalar qoldanyp keledi. 2015 jyldan bastap qazirge deıin oblys boıynsha sheneýnikterdiń kásipkerlik sýbektileri qyzmetine aralasýdyń 41 faktisin anyqtalǵan. Sotqa deıingi tergeýdiń biryńǵaı tiziliminde 95 qylmystyq is tirkelgen. Qylmystyq jaýapkershilikke 59 laýazymdy tulǵa, túrli jazaǵa 52 laýazymdy tulǵa tartylǵan. Jalpy 72 kásipkerlik sýbektisiniń quqyǵy qorǵaldy», - dedi oblystyq Ulttyq búro basshysy.

Turǵanbaevtyń sózinshe, qylmystyń kópshiligi salyq qyzmeti, atqarýshy bılik organdarynyń qyzmetkerlerimen, sondaı-aq, zańbuzýshylyqtar ádilet organy, aýyl sharýashylyǵy, jergilikti atqarýshy bılik organynyń qyzmetkerleri tarapynan jasalǵan. Atamysh jaǵdaıdardyń barlyǵy para alýmen baılanysty jáne paranyń quny 300 myńnan 2 mln teńgege deıin quraǵan.

Forým barysynda óńir kásipkerleri birqatar júıeli máselelerdi de ortaǵa saldy.

Shara sońynda Almaty oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl agenttigi departamenti, Almaty oblysy boıynsha Sybaılas jemqorlyqqa qarsy kúres jónindegi Ulttyq búrosynyń (Sybaılas jemqorlyqqa qarsy qyzmet) departamenti men Almaty oblysynyń Óńirlik kásipkerler palatasy arasynda sybaılas jemqorlyqqa qarsy kúres jáne kásipkerler men ınvestorlardyń quqyqtaryn qorǵaý jónindegi yntymaqtastyq týraly tórtjaqty memorandýmǵa qol qoıyldy.